Amerıka qurama shtattarynda qazaq tilinde oqytatyn bilim shańyraǵy ashylady. Belsendiler mektepten bólek, óskeleń urpaqty ulttyq rýhta tárbıeleý úshin dombyra jáne án-kúı úıirmesin qosa ashýdy josparlap otyr. Bul jaıly "Adyrna" ulttyq portaly habarlaıdy.
AQSh astanasy Vashıngtonda qazaq mektebi ashylady. Sebebi, balasyna ana tilinde bilim bergisi keletin ata-analar qatary jyl sanap artyp keledi. Jat jurtta qazaqtardyń óz tamyrynan ajyrap qalmaýy úshin qazaq-amerıkan qaýymdastyǵy birqatar betburystarǵa den qoıýǵa daıar.
- Qazir qarap otyrsaq bes, alty jasqa kelgen balalar bar. Qazaq tilin oqımyz dep jatyr. Qazaqstannan oqýlyq ákelip jatyrmyz. Tildi saqtaý úlken maqsat bizdiń. Tildi, dástúrdi saqtaý. Erteń biz qazaqpyz, biz Otanymyz joq, tamyrymyz joq emes, elimiz bar, tamyrymyz bar, dástúrimiz bar dep sondaı balalar óssin dep oılaımyz, - deıdi Qazaq-amerıkan qaýymdastyǵynyń jetekshisi Darhan Nurmahanbet.
Qazaq tildi mektepten bólek, óskeleń urpaqty ulttyq rýhta tárbıeleý úshin belsendiler dombyra úıirmesi ashylyp, «Balaýsa» attty hor qurylmaqshy.
AQSh-ta alpysynshy jyldary nebári jıyrmaǵa jýyq qazaq otbasy bolsa, qazirgi tańda qandastardyń qatary eselip ósip, sany 100 myńǵa jýyqtaǵan. Onyń bir bóligi Túrkııa, Mońǵolııa, Qytaı sekildi memleketterden kelgen qandastar. Qazaq dıasporasynyń eń kóp shoǵyrlanǵan jeri - Nıý-Iork qalasy. Odan keıingi orynda Maıamı, Los-Anjeles pen Chıkagoda qalalary kósh túzeıdi.
"Adyrna" ulttyq portaly
