Belgili aıtysker aqyn Rınat Zaıtov joǵary bılik ókildirine úndeý tastap, tapqan nápaqasy qant-shaıynan aspaıtyn halyqtyń qazirgi hál-jaǵdaıyna qatysty suraqtarǵa jaýap berýlerin surady. Bul týraly “Adyrna” ulttyq portaly jazady.
Qazaqstan Respýblıkasynyń Premer-Mınıstri Álıhan Ashanuly Smaıylovqa,
Qazaqstan Respýblıkasy Prezıdenti Ákimshiliginiń Basshysy Murat Ábýǵalıuly Nurtileýge
Qazaqstan Respýblıkasynyń Memlekettik keńesshisi Erlan Tynymbaıuly Qarınge
Eńbek jáne halyqty áleýmettik qorǵaý mınıstri Tamara Bosymbekovna Dýısenovaǵa
Qazaqstan Respýblıkasynyń Mádenıet jáne sport mınıstri Dáýren Áskerbekuly Abaevqa
Bul hatty joǵaryda aty atalǵan laýazymdy tulǵalarǵa joldaýymnyń sebebi, qoıylǵaly turǵan suraqtyń naqty jaýabyn tek solar ǵana bere alatynyn bilemin. Ókinishke qaraı, kóterilgeli turǵan másele jalǵyz Almaty qalasy ákimdiginiń Mádenıet basqarmasyna qarasty «Alataý» dástúrli óner teatrynyń ǵana emes, kúlli halyqtyń qabyrǵasyna batyp tur.
Qurmetti hatta aty kórsetilgen hanymdar men myrzalar!
Men Qazaqstan Respýblıkasynyń azamaty, mádenıet salasynyń úzdigi, «Qurmet» ordeniniń ıegeri, «Alataý» dástúrli óner teatrynyń dırektory, aıtysker aqyn jáne ótkende ǵana ótken Qazaqstan Respýblıkasynyń Prezıdentin ulyqtaý rásiminde tikeleı bolyp, prezıdentti óz kózimen kórip, aıtqanyn óz qulaǵymen estigen adam retinde sizderge bir suraq qoıǵym keledi.
«Alataý» dástúrli óner teatry Almaty qalasyna ǵana emes, Qazaqstan memleketiniń barlyq aýmaǵyna atadan qalǵan asyl mura - ulttyq dástúrli ónerimizdi jańasha úlgide tanystyryp, nasıhattap otyrǵan birden-bir mekeme.
Meniń bul Teatrǵa taǵaıyndalǵanyma 703 kún boldy. Atalǵan ýaqyttyń ishinde Qazaqstanda Ulttyq ónerge, mádenıetke bar kúsh-jigerimen úles qosyp, óz memleketiniń qaryshtap damýyn qalaıtyn azamattardyń bar ekenine meniń kózim ábden jetti.
Ol atalmysh Teatrdyń ujymy.
Janǵa batatyny, jumysyn adal istep, ákimdiktiń jumsaǵanyna júgirip, keregine jarap, jańa Prezıdentpen jańasha ómir súrýge úmittenip otyrǵan qyzmetkerlerdiń jaǵdaıyn qansha jasyrsaq ta kúnnen-kúnge tómendep barady.
Óıtkeni, aınalany jaılaǵan qymbatshylyq Teatrdy da aınalyp ótpeıtini anyq. Kúni keshe, bizdiń depýtattardyń ishinen «Qazaqstanda kez-kelgen azamattyń ómir súrýi úshin aıyna 100 myń teńge jetedi»,- dep jurtty shýlatypty. Halyq depýtatty jerden alyp, jerge salyp «100 myń teńge qaıda jetedi?»,- dep ókpeledi.
Dál osy kezde eki jylǵa jýyq ýaqyt boıy birneshe býhgalterlermen aqyldasyp, ózim jaýabyn tappaı júrgen bir suraqty ózderińizge qoıýǵa bel býdym.
Endigi suraq: «Alataý» dástúrli óner teatrynyń kassıri Sarsenova A.M. úsh balanyń anasy, ıpoteka tólep otyr, aılyǵy - 74 705 tg. Dál osyndaı jaǵdaıdaǵy kontroler Rahymgalıeva G. Ý. 72 791 tg alady. Al úıi joq úsh balanyń anasy kontroler Tabanova R. S. 67 044 tg aılyqty qanaǵat tutýǵa májbúr. (Taǵy sol sııaqty 100-den asa mysal keltirip bere alamyn)
Aıtyńyzdarshy, dúkendegi baǵalarmen balalardyń qarapaıym negizgi qajettilikterin eskere otyrsaq, kórsetilgen aqshany olar 30 kúnge qalaı jetkizbek?!
Jaýabyn sizder bilýlerińiz kerek. Olaı deıtin sebebim, Memlekettiń sheshýshi laýazymdaryna ornalasyp, teledıdardan «Qazaqstan damyp kele jatyr, eldiń jaǵdaıy jaman deıtinder ekstremıster, popýlıster men arandatýshylar» dep aıdar taǵyp otyrǵan ózderińiz.
Meni de sol qatarǵa ońaı qospaýlaryńyz úshin suraǵyma qanaǵattanarlyq jaýap taýyp bere alsańyzdar qyzmetimdi óz erkimmen bosatyp, sizderdiń taraptaryńyzǵa birde bir jaman sóz aıtpaı, bergen barlyq madaq-ataqtaryńyzdy qaıtaryp berip, sonymen qatar aıtystan utqan «Asyl dombyramdy» syıǵa tartýǵa ýáde beremin.
Erteńge degen úmitpen Rınat Zaıtov
“Adyrna” ulttyq portaly
