Qyrǵyzstan tarapy sý berýdi toqtatty. Kelisilgen lımıt bitti deıdi. Kırov sý qoımasynan sý jiberetin edi. Endi Jambyl oblysyndaǵy dıqandardyń jaǵdaıy qıyn, ásirese Qordaı aýdanyndaǵy eginshiler qınalýda. Jambyl oblysynyń 80 paıyz sýy Qyrǵyzstannan keledi eken.
Qyrǵyz tarapy sýdyń ózderine jetpeı jatqanyn aıtýda. Jaǵdaı máz emes.
Jalpy sý tapshylyǵy endi jyl saıyn arta beredi. Ásirese, bizde. Iri ózenniń barlyǵy derlik transshekaralyq. Ile, Ertis, Shý, Talas, Jaıyq, Syrdarııa degendeı. Ózenniń bastaýy bizdiki emes, ıaǵnı ózenniń sýyn da retteı almaımyz. Qysym rychagy ózgelerdiń qolynda.
Kórshiles elder sý berýdi endi azaıta beredi. Birinshiden ózderine de sý jetpeýde, muzdyqtar erip jatyr. Ekinshiden álemde, bizde jáne kórshilerimizde halyq sany artýda, demek sharýashylyq sany da, óndiris oshaqtary sany da kóbeıýde. Sáıkesinshe sýdy qoldaný da arta beredi. Osylaısha bizge keletin sý jyl saıyn azaıady dep oılaımyn. Kelissózder arqyly lımıtti arttyrýǵa bolar, tegin emes árıne. Biraq ol ýaqytsha shara.
Aýyl sharýashylyǵynda jańa tehnologııany engizýdi jyldamdatý mańyzdy. Tamshylatyp sýarý jáne basqa degendeı. Ol sýdy únemdeýge kómektesedi. Sharýalarǵa sýdy kóp qajet etpeıtin kókónis, dándi-daqyl sorttaryn jetkizý qajet. Bunyń barlyǵy izdenis pen qyrýar qarjyny qajet etedi. Aýyl sharýashylyǵy eski júıede qalǵan elderde sýdy qısapsyz paıdalaný bar. Aryqtarmen myńdaǵan tonna sý bosqa topyraqqa sińip ketedi.
Budan bólek sý saqtaý qoımalaryn ár aımaqqa salý, ony qysta qar sýymen toltyryp, jazda egistikke qoldanýdy da mamandar usynýda. Bul da qymbat, biraq qajet dúnıe. Sý únemdeýdi balabaqshadan bastap barlyq adamǵa úıretý de mańyzdy. Saryldatyp sýdy aǵyzyp qoıyp, ózi jaıbaraqat júretin kezeń kelmeske aqyryndap ketýi múmkin.
Bunyń barlyǵy da júz ret aıtylǵan, jazylǵan dúnıe ǵoı. Júz birinshi ret taǵy jaza salaıyn dedim.
Bizdi sýǵa baılanysty kórshi eldermen alda qıyn kelissózder kútip tur. Onyń nátıjesi de óz saıası, ÁSKERI, ekonomıkalyq salmaǵymyzǵa baılanysty.
