Bırneşe öŋırdı su alyp, el basyna kün tuǧanda aqyndar ünsız qalmady. Olar ıştegı mūŋ men halyqtyŋ qazırgı küiın öleŋ arqyly jetkızude.
Aqyn Qaiyrbek Şaǧyr Facebook paraqşasyna ne üşın kün oqiǧasyn öleŋge tüsırgenın bylai tüsındırıptı.
"Lirikaǧa saiasatty aralastyrmaiyn deisıŋ, bıraq ainalada bolyp jatqan oqiǧalar köŋılıŋdı alaŋdatqan soŋ, öleŋge tüsırmeske laj joq", - dep öleŋ arnady.
Qalǧanda su astynda momyn jandar,
Aqşanyŋ tasqynyna şomylǧandar,
El basyna kün tuǧan myna künde,
Etıkpen su keşuge qorynbaŋdar.
Uaiymdap kedei jür ǧoi kreditın,
Ösımqor miyǧynan küledı itıŋ.
Halyqty künkörıske bailap qoisa,
Qūl qylu oŋailyǧyn bıledı itıŋ.
Aqyn Erşat Qaiboldin de su basqan auyldardyŋ jäi-küiın jyrlaǧan:
Köktem saiyn auyldy su basady,
Köktem saiyn aǧaiyn şulasady.
Sudan qūrǧaq şyǧatyn suait kökem
Saly suǧa ketkendei tür jasady.
“Belgılı ǧoi tasqynnyŋ jüretını,
Sabyr, sabyr” kökemnıŋ bıletını.
Balşyq basyp körmegen sudai jaŋa,
Şırkın, qandai ädemı su etıgı?!
Halyqtyŋ köktemgı köŋıl-küiın sel būzǧan.
Sätjan Kärıpbaev bilık ökılderınıŋ raportyna meŋzep "Tūraqtaldy" dep jyrlatyp, baspanasyz qalǧandardyŋ jaiyn aitty.
Qazaq san ötkerse de synaqtardy,
Būl qoǧam...
Qaşan da bır-aq qalpy...
Topan su jailap jatqan jerdı körsem...
Kökeiımde onsyz da san sūraq qaldy.
Bas qaiǧy baspanasy... Bala jylap,
Zar ilep,el bilıkke syr aqtardy.
Syr aqtardy...
Bilıkten bır-aq jauap...
"Ol audanda jaǧdai sol tūraqtaldy".
Aqyn Däuren Berıkqajyūly Facebook jelısındegı paraqşasynda:
Öz-özınen şeşıletın siiaqty
Būl qazaqtyŋ taǧdyry -
Tym alaŋsyz qar jauady ūiatty,
Tym mezgılsız sırkıreidı jaŋbyry.
Baǧym ūşyp baratqandai bastaǧy
Terlep şyqsam öz-özımdı sūraqqa ap.
Tym köŋıldı körınedı aspany,
Aqpany da tym beikünä, tym äppaq.
Künnen-künge tüsınuden qaldym men
Būl ūlysty, rasynda.
Şyǧar dep em aqyl-esım säl kırgen
Däl osynau jasymda.
Qazaq dese janyn syǧyp beretın
Tym süikımdı mazdaidy ot oşaqta.
Sonda menıŋ äldeqandai köretın
Memleketım osy-aq pa? - dep öleŋdettı.
Tasqyn mäselesıne bei-jai qarai almaǧan aqynnyŋ bırı - Arman Jusanbaev. Ol sel basyp, bögetter būzylyp jatqandaǧy bilıktıŋ bügıngı äreketın synǧa aldy.
Közın jasyn sorly elım köl etkende,
Sel basty da būzyldy böget demde...
Jemqorlyqpen betpe-bet kelıp tūrsyŋ,
Qiiamet kün qyinalyp sol ötkelde!.
Toimadyŋ ba sudyr söz uädege,
Qūrǧaq qiial –jel qaiyq qua berme!.
Jūmaq jasau özıŋnıŋ qolyŋda tūr,
Tozaq jasau tıptı oŋai myna jerde!
Jaǧympazdar jalbaqai qyrtqa ainalar,
Qaida qamsyz alaŋsyz jūrtqa jäi bar?
Salyŋ suǧa ketkende topalaŋmen,
Qūtqarmaidy senı kep Nūq paiǧambar!
Aqyn Sanjar Kelekeev te "Äi, Ükımet!" dep syndarly şaqtaǧy bilıktıŋ äreketın synǧa aldy.
Jazamyn jabyǧyp jyr, toryǧyp än,
Kım bar ei... kım bar deisıŋ sony ūǧynǧan?
Bas-basyna bi bolǧan kökelerdıŋ,
Kelmeidı eken topan su tobyǧynan.
Qardyŋ suy.
Qarǧyn su dalany alyp,
Panalaǧan baiǧūs jūrt jaǧa baryp.
Maŋdaiynan bes elı sor ketpegen,
Sol baiaǧy, baiaǧy qara halyq.
Isı basqa..
Sözderı kıl jasandy,
Qu bilıkke qaraidy kün qaşanǧy?
Uädesınıŋ tükke de tamtyǧy joq,
Qūr mınbede otyryp şulasady.
Bögetı joq..
Qatyrǧan bögenı joq,
Köktem kelse jerımdı su basady.
Tükke tūrmas söz qylyp nasybaidy,
Tükırıgı auyzynan şaşyraidy.
Kötenderın mai basqan kökelerım,
Kresloǧa qūl bolǧan basybaily.
Öz jyrtyǧyn jamaǧan öz elıne,
Eşbırınıŋ jandary aşymaidy.
Senı qaidam bilıgım...
Men qaiǧyrdym.
Tumastai bop kögımnen endı ai, künım.
Ot alady qisapsyz jer bailyǧyn,
Jat alady esepsız el bailyǧyn.
Söz tüsınse bas izer qūptaǧany,
Qanşa aitsaŋ da ūqpaidy , ūqpaǧany.
Äi, Ükımet qaşanǧy jūt bolady,
Qaşan bızdıŋ Qazaqqa qūt qonady ?
Jauap ber?!
Äleumettık jelıde oqiǧaǧa ün qosqan aqyndar bır būl emes. Degenmen alǧaşqy lekpen 12 oblysta bolǧan apatty jaǧdaiǧa bei-jai qaramai, janymen bolsa da elımen bırge ekenın tanytqan aqyndar toby osyndai boldy.
Symbat Nauhan
"Adyrna" ūlttyq portaly
Ūqsas jaŋalyqtar
