Atyraý oblysy ákiminiń orynbasary Jasulan Bısembaev aımaqtaǵy ahýalǵa baǵa berip, turǵyndarǵa úndeý málimdeme jasady, dep habarlaıdy "Adyrna" ulttyq portaly.
Bısembaev Qulsaryda bolyp jatqan jaǵdaıdy óte kúrdeli dep atady. Jylyoılyqtar tasqyn sýmen úshinshi kún qatarynan kúresip jatqanyn jáne zardap shekkenderge barlyq kómek kórsetiletinin aıtty ol:
"Qurmetti aǵaıyn! Ardaqty Atyraýlyqtar! Qulsaryda bolyp jatqan ahýal óte kúrdeli.
Jylyoılyqtar tasqyn sýmen kúreske bel sheshpeı 2 apta daıyndalyp, 3 kún boıy qarǵyn sýmen kúresti. Biraq, tilsiz jaý qalany basyp ketti. Zardap shekken baýyrlarymyzǵa barlyq kómek kórsetilýde, shyǵyn kólemi de óteledi. Degenmen, Atyraý qalasy da bul taǵdyrdy qaıtalaýy múmkin. Sý basý qaýpi Orynbor, Oral qalalarynan kem bolmaıdy degen boljam bar" dep jazdy ol.
Sondaı-aq, ákimdiktiń daıyndyǵyn atap 20 qurylys kompanııasy jáne 6 iri munaı kompanııalary jaǵdaıdy basqarýǵa at salysyp jatqanyn atady Bısembaev:
"Álbette ákimdik daıyndalýda, 5 kúnnen beri óńirdiń eń úlken 20 qurylys kompanııasy jáne 6 iri munaı kompanııalary jaǵalardy bekitýge, qorǵaý dambalaryn salýǵa jumyldyryldy. Qajetti materıaldardyń (qapshyq, kúres jáne tb) rezervin daıyndalyp, ınertti zattar jınaqtaldy. Orynbor oblysyndaǵy Irıkla sý qoımasynan Jaıyqqa jiberilgen sý Qazaqstan aýmaǵynda Batys Qazaqstan oblysy arqyly Atyraýǵa oblystyń Inder, Mahambet aýdandarynyń aýmaǵymen aǵyp keledi. Inder aýdany boıynsha jaǵa bekitý jumystaryna 54 arnaıy tehnıka, 408 qyzmetker jumyldyrylǵan. Qazir aýdanda Jaıyq ózeniniń jaǵalaýyndaǵy qaýipti aýmaqtarǵa jalpy uzyndyǵy 10 km bóget soǵyldy. Ol jumystarǵa 37950 dana qapshyq paıdalanyldy. Tasqynǵa qarsy kúres jumystary jalǵasýda. Mahambet aýdany boıynsha eldi mekenderdiń sýdan qorǵaný bógetteriniń jalpy uzyndyǵy – 80 kılometr. Jaıyq ózeni boıynda ornalasqan 17 eldi mekenniń ishinde 9 qorǵaný bógeti osal. Olar Taldykól, Beıbarys, Alǵa, Mahambet, Sarytoǵaı, Eski Saraıshyq, Eńbekshil, Esbol jáne Ortaqshyl aýyldary tusynda. Tasqynnan qorǵaný úshin 56 myń dana qapshyqqa topyraq qaptalyp, ózen jaǵalaýy bekitildi. Bul jumystarǵa barlyǵy 95 tehnıka, 142 qyzmetker, 1300 erikti jumyldyryldy" delindi onyń málimdemesinde.
Bısembaev sonymen qatar Jaıyq ózeniniń quıar saǵasyndaǵy Atyraý qalasynda barlyǵy 12 aýmaqta jaǵa bekitý jumystaryn 172 tehnıka júzege asyrylyp jatqanyn, qazir jaǵa bekitý boıysha 2 metr bıiktikte jalpy uzyndyǵy 7 km bógetter salynǵany qosa ketti.
Qazirgi tańda atalǵan jumystardy jalpy sany 5 myńnan astam adam iske asyrýda. Onyń ishinde, ákimdiktiń jáne Qorǵanys mınıstriliginiń, Ulttyq ulannyń, Tótenshe jaǵdaılar, Polıııa departamentteriniń ókilderi jumyldyrylǵan. Sonymen qosa, bul iske 4 000-ǵa jýyq eriktiler toby da úles qosýda.
"Biraq bul áli de jetkiliksiz. Sebebi, búgin Orynbordaǵy Irıkla sý qoımasy rekordty sý kólemin taǵy da jiberdi. Mundaı sý kólemi bizdiń tarıhymyzda bolmaǵan! Sondyqtan el bolyp, biriligimizdi kórsetip qalamyzdy apattan aman alyp qalýǵa jumylaıyq. Bizge ár atyraýlyqtyń kómegi kerek. Barlyǵymyz bir kisideı Jaıyq jaǵasyn kótereıik. Kóp túkirse kól degendeı, ár azamat bir qapshyq qumdy jaǵaǵa ákelse, úlken beket bolary sózsiz. Biz bul synaqtan birlik arqyly ǵana shyǵa alamyz! Barshańyzdy jaǵa bekitý jumystaryna qatysýǵa shaqyramyn!" dep jazdy Jasulan Bısembaev.
