Mektep qabyrǧasynda jürıp, türlı jobalar qatysqan oquşy Däuren Ahmettı belgılı kompaniia jūmysqa şaqyrǧan. Tiıstı salada ıs-täjıribeden ötken jas önertapqyş öz jobalarynyŋ erekşelıkterımen bölıstı.
Almatydaǧy №178 mamandandyrylǧan liseidıŋ 11 synyp oquşysy Däuren Ahmet - önertapqyş. Ǧylymǧa den qoiǧan önertapqyş qazaq tılındegı komandamen jūmys ısteitın «aqyldy üi» jobasyn oilap tapty.
MÜMKINDIGI KÖP ÜIDIŊ QOJASY – QOL TELEFONY
Däuren Ahmet būǧan deiın bırneşe ret respublikalyq ǧylymi jobalar baiqauyna qatysyp, jüldeger atanǧan.
- Zertteuge degen qyzyǧuşylyǧym 7 synyp oqyp jürgen kezımde bastaldy. Däl sol jyly mektebımızde robototehnika üiırmesı aşylǧan edı. 1 jyl boiy jetekşım Dastan Rahatovtyŋ kömegımen būl salanyŋ qyr-syryn zerttedım. Alǧan bılımımnıŋ nätijesınde avtomattandyrylǧan qoqys jäşıgın jasaǧan bolatynmyn. Ol adamdardyŋ kele jatqanyn sezıp, qaqpaǧyn bırden aşatyn. Solai-solai jaŋa dünielerdı qūrastyruǧa degen yntam aşyldy, - deidı jas daryn.
Uaqyt öte kele Däuren telefon arqyly basqaruǧa bolatyn zamanaui üidı jasaudy qolǧa alǧan. Mümkındıgı köp üide tūru üşın qolyŋyzda telefon bolsa jetıp jatyr.
- 9 synyp oqyp jürgen kezımde synyptasym Tölegen Diaspen «SMS-habarlamalar arqyly zattardy basqaru funksiiasy bar aqyldy mektep jobasy» taqyrybynda ǧylymi-zertteu jūmysyn jazdyq. Tehnikanyŋ damyǧan zamanynda zamanaui tehnologiialardyŋ kömegımen SMART SCHOOL jobasy arqyly respublikalyq kezeŋge joldama alyp, Almaty qalasynyŋ atynan qatystyq, - deidı ol.
QAUIPSIZDIK JÜIESINDEGI «AQYLDY ÜI»
Däuren keiın osyǧan ūqsas jūmystardy damytqysy kelgenın aitady.
- Osylaişa nazarymyz soŋǧy jyldary erekşe tanymaldylyqqa ie «Aqyldy üi» jobasyna tüstı. Men de däl osyndai önertabys jasaǧym kelıp, 10 synypta öz zertteuımdı bastadym. Izdenıs barysynda «aqyldy üilerdıŋ» köpşılıgı orys ne aǧylşyn tılınde jūmys ısteitınıne köz jetkızdım. Osylaişa olardy nege qazaqşa söiletpeske degen ideia kelıp, joba jūmysyn bastap kettım. Synyptasym Raiymbek Miraqparovpen jasaǧan üi qazaq tılınde qaşyqtan da basqaryla beredı. Oǧan arnaiy baǧdarlamalardy ornattyq. Jaryq öşıp qalsa, üi generator arqyly quat alady. Eger üi iesı şetelge ketıp qalsa, SMS arqyly üidegı jaǧdaidy baqylap, rettei alady, - degen ol jobany jasauda baǧdarlamalardy jasap şyǧu qiyn bolǧanyn aitady.
Jas zertteuşınıŋ aituynşa, «Aqyldy üi» jobasy qauıpsızdık jüiesıne qosylǧan.
- Dalaǧa şyǧyp bara jatqan kezde «lazer» dep aitu kerek. Būl arnaiy komanda arqyly esık-terezelerde lazer paida bolady. Eger üige beitanys adam kelıp, ol lazerdı qiyp ötse, avtomatty türde üi iesıne qoŋyrau şalynady. Osylaişa män-jaidy qaşyqta otyryp-aq bıluge bolady. «Aqyldy üi» adamdarǧa qolailylyq pen jarqyn ömır süruge mümkındık beredı, - dep tüsındırdı Däuren Ahmet.
«BYLTYR JASYM JETPEDI, BİYL BASTAIMYN»
Däuren Ahmet būl jobaǧa köptegen jannyŋ qyzyǧuşylyq tanytqanyn atap öttı.
- «Aqyldy üidı» «Digital Almaty-2023» atty halyqaralyq sifrlyq forumynda tanystyrǧan bolatynbyz. Sol kezde bızdı orys tılınde aqyldy üi qosymşasy men qūrylǧysyn jasap jürgen «Connect home» kompaniiasy ıs-täjıribeden ötuge şaqyrdy. Būl kütpegen jaŋalyq boldy. Bılıktı mamandardan köp dünienı üirendık. Olar tıptı resmi türde bırlesıp jūmys ısteuge de ūsynys tastady. Ökınışke qarai, ötken jyly jasym jetpedı. Būiyrsa, biyl baǧymdy synap, jūmysty bastamaqpyn,- dedı talantty oquşy.
Däuren biyl altyn ūia mektebımen qoştasyp, ülken ömırge qadam baspaqşy. Qazırdıŋ özınde onyŋ bolaşaqqa arnaǧan özındık joba-jospary bar.
Diana Asan,
«Adyrna» ūlttyq portaly
