Senbı, 10 tamyz künı İzrail qorǧanys küşterı (IDF) Gaza sektoryndaǧy Äl-Tabiin mektebıne äueden soqqy jasady, - dep habarlaidy “Adyrna” ūlttyq portaly DW basylymyna sılteme jasap.
IDF aituynşa, ǧimaratta İzrailge şabuyldar josparlanǧan palestinalyq Hamas qozǧalysynyŋ basqaru ortalyǧy ornalasqan. Habarlamada komandalyq punkttıŋ tabylǧany, şabuyldyŋ AQŞ pen İzraildıŋ barlau qyzmetterımen üilestırılgenı atap ötıldı. Sonymen bırge, mektep ǧimaratynyŋ janynda ornalasqan meşıt Gaza qalasynyŋ tūrǧyndary üşın baspana retınde qyzmet etedı, dep habarlady İzrail armiiasy.
«Şabuylǧa deiın beibıt tūrǧyndardy qorǧau üşın bırneşe qadamdar jasaldy. Onyŋ ışınde oq-därılerdı äueden baqylau jäne barlau şaralary jürgızıldı», - delıngen habarlamada.
IDF «Hamas halyqaralyq qūqyqty jüielı türde būzdy jäne azamattyq oryndarǧa äreket etedı, beibıt tūrǧyndar men mekemelerdı özınıŋ laŋkestık äreketterı üşın tırı qalqan retınde aiausyz paidalanady» dep qosty.
Katar telearnasy Al Jazeera men Al-Mayadeen telearnasynyŋ habarlauynşa, soqqy saldarynan kemınde 100 adam qaza tauyp, ondaǧan adam jaralanǧan. Palestinalyq WAFA aqparat agenttıgınıŋ habarlauynşa, mektepte soǧystyŋ saldarynan baspanalaryn tastap ketuge mäjbür bolǧan palestinalyqtar bolǧan. Kuägerlerdıŋ sözınşe, soqqy eskertusız senbı künı kün şyqpai tūryp jūrt namaz oqyp jatqan şaqta jasalǧan. Ǧimaratqa ekı raketa tüsken dep aitylady.
İzrail armiiasynyŋ ökılı öz kezegınde şabuyl nätijesınde «20-ǧa juyq sodyrdyŋ» öltırılgenın aitty. Onyŋ aituynşa, HAMAS taratqan aqparat IDF derekterıne säikes kelmeidı jäne soqqy türıne jäne qoldanylǧan zymyrandardyŋ däldıgıne janaspaidy.
Ūqsas jaŋalyqtar
