Almaty jastarynyń baspana máselesi qalaı sheshilýde?

2415
Adyrna.kz Telegram

Statıstıkalyq málimetterge súıensek, Almaty qalasy eski úılerdiń sany jaǵynan birinshi orynda. Qazir apatty jaǵdaıdaǵy  81 úıdi buzýǵa sheshim qabyldanǵan. 25 533  azamat baspana kezeginde tur. Qala ákimi Baqytjan Saǵyntaevtyń sózinshe,  bıyl 3800 otbasy baspanamen qamtamasyz etiledi. Onyń 1300-den astam páteri «Baqytty otbasy» baǵdarlamasymen berilse, 1000-ǵa jýyǵy jaldamaly páter bolady. Sondaı-aq 35 jasqa deıingi jastarǵa jeńildetilgen baǵdarlama ázirlenip otyr.

Qala ákimdigi jastardy baspanamen qamtýǵa arnaıy baǵdarlama qabyldap, ony «Almaty jastary 3.0» dep atady.

«Almaty jastary 3.0» turǵyn úı baǵdarlamasynyń basty ereksheligi – paıyzdyq mólsheri tómen. Buǵan bıýdjettik mekemelerde qyzmet isteıtin barlyq maman qatysa alady. Olarǵa quny  13 mln teńgege deıingi satyp alýǵa ıpotekalyq nesıe 5 paıyzben beriledi. Satyp alatyn úıdiń bastapqy jarnasy – 10 paıyz. Beriletin nesıeni árkim óz tólem qabiletine qaraı 3 jyldan 25 jylǵa deıin rásimdeı alady.

Aıta keterligi, bıýdjettik sala qyzmetkerlerine – muǵalimder, dárigerler, ýnıversıtet oqytýshylary, mádenıet jáne sport salasynyń ókilderi , jýrnalıster men ǵalymdar, ákimshilikke qarasty mekemelerdiń qyzmetkerleri jatady.

«Almaty jastary 3.0» baǵdarlamaǵa qatysýshy jastarǵa qoıylyatyn talaptar:

  1. Qazaqstan Respýblıkasynyń azamaty bolý kerek;
  2. Qatysýshynyń jasy ótinish berý kezinde 35 jasqa deıin bolý kerek. Negizgi qatysýshy retinde erli-zaıyptylardyń biri ǵana qatysa alady;
  3. Qatysýshynyń  resmı jumys ótili boıynsha Almaty qalasyndaǵy mekemelerden  kem degende sońǵy 6 aı  mindetti zeınetaqy mólsherlemesi bolý qajet.
  4. Úmitkerde jáne onyń otbasy múshelerinde menshik quqyǵynda turǵyn úıdiń, sondaı-aq Qazaqstan Respýblıkasynyń aýmaǵynda sońǵy 5 jyl ishinde turǵyn úı jaǵdaıynyń ádeıi nasharlaýy faktileriniń bolmaýy, Qazaqstan Respýblıkasynyń aýmaǵynda memlekettik baǵdarlamalar jelisi boıynsha alynǵan otbasynyń basqa músheleriniń ortaq birlesken (úlestik) menshigin quraıtyn úlestik menshiktegi úles nemese jalǵa beriletin turǵyn úıi bolmaýy kerek. Jekeshelendirý nemese muragerlik quqyǵy nátıjesinde baǵdarlamaǵa qatysýshy nemese kámeletke tolǵanǵa deıin otbasy músheleri alǵan jyljymaıtyn múliktegi úlesi 4-shi (osy talapqaqa – avt.) talapqa qosylmaıdy;
  5. Qatysýshynyń Almaty qalasyndaǵy jumys ótili kem degende 6 aı bolý kerek. Ol zeınetaqy aýdarymymen rastalady.

Baǵdarlamaǵa qatysýǵa tómendegideı qujattar qabyldanady. Áýeli ótinish jazylady:

 

_____________________________________

azamat (sha) (tegi, aty-jóni)

_____________________________________

turǵylyqty meken-jaıy

Ótinish

 

"Almaty Jastary 3.0" qalalyq jeńildetilgen nesıe berý baǵdarlamasy arqyly, turǵyn úı qaryzyn (zaemyn) qamtamasyz etýdi suraımyn.

Aqparattyq júıelerde qamtylǵan zańmen qorǵalatyn qupııany quraıtyn málimetterdi paıdalanýǵa kelisemin.

________________

toltyrǵan kúni

___________

qoly

 

 

 

 

1) Úlgi boıynsha ótinish;

2) Bilimi týraly skanerlengen qujat;

3) 2008 jylǵa deıin alynǵan neke qııý týraly skanerlengen kýálik (bar bolsa);

4) 2008 jylǵa deıin alynǵan balalardyń týý týraly skanerlengen kýáligi (bar bolsa);

5) Ótinish berýshige jáne Qazaqstan Respýblıkasy boıynsha barlyq otbasy múshelerine jyljymaıtyn múliktiń joq (bar) ekendigi týraly anyqtama;

6) Belgilengen úlgidegi fırmalyq blankide jumys ótili kórsetilgen, ótinish pen qujattardy tapsyrǵan kúnge 10 jumys kúnnen artyq emes merzimde berilgen skanerlengen jumys ornynan anyqtama;

7) Qazaqstan Respýblıkasy Eńbek kodeksiniń 35-babyna sáıkes eńbek ótilin rastaıtyn skanerlengen qujattar;

8) Almaty qalasy mádenıet basqarmasynan skanerlengen rastaıtyn anyqtamalar (qujattar) (atalǵan talap, mádenıet salasyndaǵy ózin-ózi jumyspen qamtyǵan qatysýshylarǵa ǵana qatysty).

 

Osy atalǵan qujattar balldyq júıe boıynsha esepteledi. Qazirgi kezde 875 jas baǵdarlamaǵa ótinish bergen.

«Almaty jastary 3.0» turǵyn úı baǵdarlamasynan bólek, 29 jasqa deıingi jastarǵa jaldamaly páterler beriledi. Bul páter 5 jyl merzimge jalǵa alynady.

 

Gúlvıra Asqar,

"Adyrna" ulttyq portaly

 

 

Pikirler