Belgili rejısser, Qazaqstannyń halyq artısi Talǵat Temenov: "Sataev fılmniń senarııin oryssha oqyǵan áıeline jazdyryp, rýhanı qylmys jasady" - dep áriptesi Aqan Sataevqa qatysty Hit-TV arnasynyń "Meniń ómirim" baǵdarlamasyna suhbat berip, óz oıymen bólisti. Bul týraly "Adyrna" ulttyq portaly habarlaıdy.
Temenovtiń aıtýynsha, "Qazaqfılm" basshylary aldymen, óz jaǵdaıyn, qala berdi qasyndaǵy jaqyndarynyń jaǵdaıyn oılaıtyn jaǵdaıǵa jetken.
- Aqan Sataev, Júrgenovti bitirgen jigit, ákesin de, sheshesin de bilemin. Biraq myna sońǵy áıeline senarııdi jazdyrypty. Qanshama ǵulamalarymyz otyr. Sonyń qasynda oryssha bitirip, qazaqtyń bir aýyz óleńin jatqa bilmeıtin, qazaqtyń bir jazýshysynyń kitabyn tól nusqada oqymaǵan adamnyń mundaı dúnıege barýy jáne oǵan birneshe mıllıon gonorar alýy jantúrshigerlik jańalyq boldy men úshin. Bul - durys emes. Bul ultty, eldi oılamaǵany. Qarahan basyn oılaǵan adam. Mundaı adamdar qazaqtyń basyna kún týsa, osynda qalyp, el qorǵaıdy, jer qorǵaıdy dep oılamaımyn, - dep pikir bildirdi Temenov.
"Tomırıs" tarıhı fılminiń senarııin Temenov te jazypty. Alaıda Sataev ony qabyldamaq túgili, qaraǵan da joq, dep ashyndy rejısser.
- Kıno degen sezim, ol júrekke tııýi kerek. Asqar Toqpanovtyń sózi bar, "erinnen shyqqan sóz eringe, júrekten shyqqan sóz júrekke jetedi" deıdi. Júrekke tımegen kınonyń quny kók tıyn. Árıne, balalar, jasóspirimderge patrıotızm dep urandatyp jatady. Basqa kóretin kıno bolmaǵandyqtan, soǵan aparamyz, - dep túsindirdi Temenov.
Sondaı-aq, Temenov fılmniń sıýjetinde ketken qatelikti atady.
"Úlken qateligi, Tomırıs Kırdiń basyn qanǵa malyp, ózi shabady. Negizi qasyndaǵy adamǵa jasatý kerek edi. Bul - "Tomırısti" jazǵan Bolat Jandarbekov sııaqty ǵalymdardyń aldynda rýhanı qylmys, qatelik", - dep málimdedi Temenov.
"Adyrna" ulttyq portaly
