Reseı Kommýnıstik partııa frakııasynyń jetekshisi Zıýganov Memlekettik Dýmada sóz sóıledi. Onda Reseıdegi sońǵy jaǵdaılardan keıin el ekonomıkasynyń birshama tómendegenin aıta ketti, dep habarlaıdy «Adyrna» tilshisi.
«Edınaıa Rossııanyń» esine salǵym keledi, eger siz sol kezde bizdi tyńdaǵanyńyzda, sheteldik bankterde 300 mıllıard dollar buǵattalmaǵan bolar edi. Reseıden 600 tonna altyn shyǵarylmas edi. Sońǵy 8 jylda azamattardyń tabysy 12 paıyzǵa tómendedi. Al halyqtyń 32 paıyzynyń tabysy eń tómengi kúnkóris deńgeıine de jetpeıdi. Mundaı jaǵdaıda ómir súrý múmkin emes. Eldiń joıylýyn qalaı toqtatýǵa bolady?», - dedi Zıýganov.
Sonymen qatar, ol munaı-gaz salasynda da qural-jabdyqtardyń tozýy 60 paıyzǵa jetkenin aıta ótti. Aıtýynsha, turǵyn úı-kommýnaldyq sharýashylyq salasy negizgi kapıtaldyń 30 paıyzyn quraıdy. Al ınjenerlik jelilerde sońǵy 20 jylda apat kórsetkishi 5-6 esege ósken.
«Injenerlik mamandyqtyń bedeli tústi. Injenersiz mashına men qural-jabdyq joq. Muǵalim jáne dáriger mamandyǵynyń da bedelin joq. Qudaıǵa shúkir, áskerı mamandyqtyń bedeli az da bolsa qalpyna keltirildi», - dedi ol Memlekettik Dýmada.
Zıýganov budan bólek, orys tiliniń qoldaný aıasy túsip bara jatqanyn málimdedi.
«Ne bizde barlyq qundylyqtarymen orys álemi bolady, nemese olar bizge Amerıkany tanytady. Máskeýdi aralap qarasańyz, jartysy aǵylshyn tilinde sóıleıdi. Orys tilin mundaı qorlaýǵa nege jol beredi?», - dep málimdedi.
«Adyrna» ulttyq portaly
