Úkimet sybaılas jemqorlardan sot arqyly alynyp, memleketke ótken aqshalaı qarajatty mektepterdiń qurylysyna berý tetigin bekitti. Tıisti túzetýler engizilgen qaýlyǵa Premer-Mınıstr Álıhan Smaıylov qol qoıdy, dep habarlaıdy «Adyrna» tilshisi.
Memleket basshysy Qasym-Jomart Toqaev 2022 jylǵy 1 qyrkúıektegi «Ádiletti memleket. Birtutas ult. Berekeli qoǵam» atty halyqqa Joldaýynda jemqorlardan alynǵan qarajatty bilim berý ınfraqurylymyn qoldaýǵa baǵyttaýdy tapsyrǵan bolatyn.
«Jalpy, mektep salý Úkimet pen ákimdikter úshin basty mindetterdiń biri bolýy kerek. Jemqorlar sottalǵanda, olardyń zańsyz tapqan qarjysy memleketke ótip, túgeldeı mektep qurylysyna jumsalýǵa tıis», — dedi ol.
Úkimettiń baspasóz qyzmetiniń jazýynsha, búgingi tańda Bilim berý ınfraqurylymyn qoldaý qoryna 121,7 mlrd teńge túsken.
«El basshylyǵynyń tapsyrmasy boıynsha Respýblıkalyq bıýdjet komıssııasy 106,7 mlrd teńgeni quraıtyn 72 jobany qoldady. Atap aıtqanda, 94,1 mlrd teńge 85 myń oryndyq 69 mekteptiń qurylysyn aıaqtaýǵa jáne taǵy 12,6 mlrd teńge 3 jańa nysannyń (eki aýysymda 1400 orynǵa arnalǵan 2 mektep jáne 200 oryndyq mektep-ınternat) qurylysyn aıaqtaýǵa baǵyttalady.
Osylaısha, bul mehanızm úsh aýysymdy oqytý, apatty mektepter men oqýshy oryndarynyń jetispeýshiligi máselelerin sheshýge aıtarlyqtaı úles qosady»,—dep túsindirdi basqarma.
